चिमुकल्यांच्या बाजारातून शिक्षणाला व्यवहाराची जोड

 

चिमुकल्यांच्या बाजारातून शिक्षणाला व्यवहाराची जोड

अग्रण, धुळगाव | दि. १० जानेवारी २०२६

जिल्हा परिषद प्राथमिक शाळा चौगुले हजारे दुधाळ मळा, अग्रण, धुळगाव येथे दिनांक १० जानेवारी २०२६ रोजी चिमुकल्यांच्या बाजार या अभिनव व उपक्रमशील उपक्रमाचे अत्यंत आनंदी व उत्साही वातावरणात आयोजन करण्यात आले. शाळेच्या परिसरात त्या दिवशी जणू छोटेखानी बाजारच फुलला होता. या उपक्रमाचे उद्घाटन शाळा व्यवस्थापन समितीचे अध्यक्ष, माता-पालक संघाचे सदस्य तसेच ग्रामस्थ यांच्या शुभहस्ते रिबीन कापून करण्यात आले.

या अनोख्या बाजारात शाळेतील चिमुकल्या विद्यार्थ्यांनी विक्रेत्याची भूमिका स्वीकारत विविध प्रकारच्या ताज्या भाज्या, घरगुती खाद्यपदार्थ, हाताने तयार केलेल्या वस्तू व इतर साहित्य आकर्षक पद्धतीने मांडले होते. आपल्या स्टॉलवर ग्राहकांना बोलावणे, वस्तूंची माहिती देणे आणि हसतमुखाने व्यवहार करणे यात विद्यार्थी पूर्णपणे रमून गेले होते. वस्तीवरील ग्रामस्थ, पालक, शिक्षक व पदाधिकारी यांनी या बाजारात उत्स्फूर्तपणे खरेदी करून विद्यार्थ्यांना प्रोत्साहन दिले.

या उपक्रमाच्या माध्यमातून विद्यार्थ्यांना केवळ खरेदी-विक्रीचा अनुभवच मिळाला नाही, तर नफा-तोटा, बेरीज, वजाबाकी, गुणाकार यांसारख्या गणिती संकल्पना प्रत्यक्ष व्यवहारातून समजल्या. पैशांची देवाणघेवाण कशी करावी, योग्य दर कसा ठरवावा आणि व्यवहार करताना प्रामाणिकपणा व शिस्त कशी राखावी, याचे धडे विद्यार्थ्यांनी आनंददायी पद्धतीने आत्मसात केले. प्रत्यक्ष जीवनात गणिताचा उपयोग किती महत्त्वाचा आहे, हे या उपक्रमातून ठळकपणे अधोरेखित झाले.

तसेच आपली उत्पादने कशी मांडावीत, ग्राहकांशी संवाद कसा साधावा आणि स्वतःच्या कष्टातून काहीतरी निर्माण करून ते विकण्याचा आत्मविश्वास कसा वाढवावा, याचे मौल्यवान कौशल्य चिमुकल्यांनी या बाजारातून शिकले. शिक्षणासोबतच जीवनकौशल्यांचा विकास करणारा हा उपक्रम सर्वांच्याच पसंतीस उतरला.

अशा प्रकारे चिमुकल्यांचा बाजार हा उपक्रम जिल्हा परिषद प्राथमिक शाळा चौगुले हजारे दुधाळ मळा, अग्रण, धुळगाव येथे यशस्वीपणे साजरा करण्यात आला. या कार्यक्रमासाठी शाळा व्यवस्थापन समितीचे अध्यक्ष व सदस्य, विद्यार्थी, माता-पालक, अंगणवाडी सेविका व मदतनीस, शिक्षक तसेच मुख्याध्यापक राजू सुखदेव आटपाडकर मोठ्या संख्येने उपस्थित होते.